Bækur Ottolengi hafa ávallt verið í uppáhaldi okkar í Salt Eldhúsi og eru mikið notaðar. Bókin Jerusalem er í sérstöku uppáhaldi og þá sérstaklega þessi lambakjötsréttur sem við fáum aldrei leið á. Ég vona að Ottolengi sé sama þó ég snari uppskriftinni yfir á íslensku. Ekki eru allir vanir að fara eftir enskum uppskriftum og þannig nær rétturinn kannski inn á fleiri heimili.

Fyrir 4-6

4 lítil eggaldin (1 kg)

4 msk. ólífuolía

salt og pipar

Kryddblanda:

1 ½ tsk. kumminduft

1 ½ msk. paprikuduft

1 msk. kanelduft

Kjötfylling:

2 msk olía

2 laukar, meðalstórir

500 g lambahakk eða nauta eða blanda af grísa og nautahakki

50 g furuhnetur

2 tsk. tómatpúra

1 tsk. sykur eða hunang

hnefafylli steinselja, söxuð

salt og pipar

Sítrónulögur í formið:

1 ½ dl vatn

1 ½ msk. sítrónusafi

1 tsk. sykur

1 tsk. tamarindpaste (má sleppa)

Blandið öllu saman í skál

Byrjið á því að hita ofninn í 210°C (200°C á blástur). Skerið eggaldin í tvennt eftir endilöngu og raðið þeim í fat með sárið upp. Dreypið ólífuolíu ofan á, saltið og piprið og bakið í ofninum í 20 mín. Takið eggaldin út og lækkið hitann á ofninum í 170°C (160°C blástur).

Blandið því sem fer í kryddblönduna í skál og setjið til hliðar.

Afhýðið laukinn og saxið smátt. Hitið pönnu og steikið hann við meðalhita í olíunni þar til mjúkur. Bætið helmingnum af kryddblöndunni  útí laukinn þegar hann er farinn að mýkjast vel. Bætið kjöthakki á pönnuna og steikið áfram. Bætið furuhnetum, tómatpúru, sykri og steinselju út í og steikið áfram í 5 mín. Saltið og piprið og smakkið til. Setjið til hliðar.

Bætið hinum helmingnum af kryddblöndunni út í sítrónulöginn og hellið honum á botninn á ofnskúffunni með eggaldinunum. Setjið kjötblönduna ofan á eggaldinið, lokið fatinu með álpappír og bakið þetta í 50 mín. Berið fram heitt eða volgt með góðu grænu salati.