Gleðilegt sumar ! Hún er sumarleg þessi fallega kaka. Hér er komin klassísk uppskrift að lagtertu með jarðaberjum. Botnarnir eru svampbotnar með örlitlu smjöri. Einföld og góð og ætti að duga fyrir 8-10.

4 egg

120 g sykur

100 g hveiti

½ tsk. lyftiduft

50 g smjör brætt og kælt lítillega

Hitið ofninn í 180°C. Þeytið egg og sykur saman þar til blandan er ljóst og létt. Sigtið hveiti og lyftiduft út í eggin og blandið því saman við með sleikju. Bætið smjörinu út í og blandið saman við með sleikjunni. Setjið smörpappír í botninn á 2 x 22 eða 24 cm smellumótum. Skiptið deiginu á milli formana. Bakið í um 20 mín. Takið úr formunum og kælið. Þið getið haft kökuna á 3 hæðum með því að nota 3×20 cm form. 

500 g jarðaber eða hindber

1 msk. sykur

½ líter rjómi 

Ef þið notið jarðaber eru þau skorin í bita ef þau eru stór, hindberin eru höfð heil. Setjið berin í skál og bætið sykri út í eftir smekk, ef berin eru vel sæt er óþarfi að nota sykurinn. Þeytið rjómann. Setjið rjóma og ber á milli botnana og ofan á. Skreytið með berjum og fánum. Ég átti litlar marenskökur sem ég bætti ofan á líka og komu vel út.