Námskeiðin okkar í Marokkóskri matargerð eru mjög vinsæl enda Marokkó þekkt fyrir matarmenningu sína um heim allan. Þar í landi eru gjarnan notaðir leirpottar sem eru kallaðir “tagine” til matargerðar. Í þessum pottum eru matreiddir dýrindis kjöt-fisk- og grænmetisréttir þar sem þeir nota spennandi kryddsamsetningar og gjarnan þurrkaða ávexti, sér í lagi með lambakjöti. Hér er uppskrift að einum slíkum lambakjötsrétt, hægt er að notast við rúmgóðan pott eða pönnu til að elda hann og árangurinn svíkur engan.

Fyrir 4-6

1 tsk. kanell

1 tsk. malaður svartur pipar

½ tsk. chili eða cayennepipar

2 tsk. paprika

2 tsk. engiferduft

1 tsk. turmerik

1 laukur, saxaður

800 g beinlaust lambakjöt, ég nota oft lambaprime skorið í þykka bita

2 msk olía

2 hvítlauksgeirar, saxaður

1 dós tómatar (400 g)

½ tsk. saffran, lagt í bleyti í 1 msk. vatn í 10 mín

50 g apríkósur

50 g sveskjur

30 g ljósar rúsínur eða dökkar

3 dl lambasoð

Setjið allt þurrkryddið í skál og notið helminginn af því til að velta kjötinu upp úr, setjið til hliðar í 2 klst eða yfir nótt.

Hitið 2 msk. af olíu í rúmgóðum potti eða djúpri pönnu og steikið laukinn þar til hann fer að verða mjúkur, bætið þá helmingnum af kryddblöndunni sem þið hélduð eftir ásamt hvítlauk út í og steikið áfram í ca. 2 mín. Takið laukinn af pönnunni og setjið hann á disk til hliðar. Bætið nú meiri olíu á pönnuna og steikið kjötbitana þar til þeir brúnast, saltið létt yfir. Bætið nú laukblöndunni og öllu öðru sem fer í réttinn á pönnuna. Látið suðuna koma upp, lækkið þá hitann og látið réttinn malla áfram í klukkustund. Smakkið til með salti og pipar. 

Berið fram með góðu brauði og kús-kús.