Nýtt Íslenskt blómkál með smjöri er eitt af því besta sem til er. Nú er gott úrval af því í verslunum en hvað annað er hægt að gera við blómkálið? Þar sem það tekur vel við kryddum er upplagt að baka það með ljúfri kryddblöndu. Gott eitt og sér en passar líka sem meðlæti.

1 meðalstór blómkálshaus

1 tsk. kumminfræ

1 tsk. kóríanderfræ

1/2 tsk túrmerik

3 msk. ólífuolía

salt og nýmalaður pipar

Hitið ofninn í 180°C. Setjið bökunarpappír í botninn á ofnskúffu. Hlutið blómkálið niður og reynið að láta stilkana halda sér, setjið það í skál. Malið kryddin saman í kryddkvörn eða í morteli, og stráið því yfir blómkálið. Blandið olíu, salti og pipar út í líka og blandið öllu vel saman. Hellið blómkálinu á bökunarpappírinn og dreifið úr því. Bakið í 20-25 mín. Hreyfið við því a.m.k. einu sinni á meðan á bakstrinum stendur.