Hvort er betra karamella eða súkkulaði? Okkur í Salt Eldhúsi hefur fundist að flestir séu veikir fyrir karamellu, sér í lagi ef hún er heimatilbúin, gullin og lekandi. Hér er kaka sem ég lærði að baka um 15 ára aldurinn. Hún hefur fylgt mér þessi uppskrift og hef ég gert allskonar tilraunir með hana en best er hún í upprunalegri mynd í formi með gati svo karamellan þeki yfirborð kökunnar vel.

240 g smjör

150 g sykur

4 egg

150 g hveiti

2 tsk. lyftiduft

Hitið ofninn í 175°C. Hrærið smjör og sykur mjög vel saman eða þar til það er ljóst og kremkennt. Bætið eggjum út í einu í einu og hrærið vel saman. Ekki hafa áhyggjur þó deigið skilji sig, það lagast þegar hveitið kemur út í. Bætið nú hveiti og lyftidufti út í, Hrærið vel saman. Jafnið deiginu í smurt form og bakið kökuna í 50-60 mín. Látið kökuna kólna aðeins, losið hana úr forminu og hvolfið á disk.

Karamellukrem:

2 dl rjómi

2 msk. síróp

120 g sykur

30 g smjör

1 tsk. vanilludropar

Sjóðið rjóma, síróp og sykur saman við vægan hita þar til það verður karamellukennt, það tekur um 8-10 mín. Bætið smjöri og vanillu út í. Hellið karamellunni yfir kökuna.